'విశ్వ విఖ్యాత నట సార్వభౌమ' (ఎన్. టి. రామారావుపై 'దర్పణం' సమూహ కవుల కవితలు)

తెగువరి

-కె.కె.తాయారు

 చిన్నతనపు చిరుగాలులు

దాటి తల్లిదండ్రుల అదుపులోనే

చక్కని పద్ధతి నలవరిచి

నాటకాల మీద మక్కువతో

 

నాటి కొప్పరపు సుబ్బారావు గారి

‘చేసిన పాపం’ నాటిక నాంది పలుకగా

అదృష్టం అందలమెక్కించే

అవనిలో తెలుగు మాత బిడ్డా!!!

 

తెగువరి వీవే

నీకివే శతకోటి వందనాలు

నా తెలుగు అనే భావం

ప్రతి ఒక్కరిలో నింపేందుకు నిలబడ్డ

వీరాధి వీరుడవు
నీకు నీవే సాటి

 

పొగడడం కాదు

పొల్లు పోనిమాట

నీ మనసు -నీ ఆశ- ఆలోచన,

క్రియా సాధక గుణమే, నీ విల్లు

నీ ఆదర్శం నీ దృక్పథం పట్టు

 

వదలని విక్రమార్కుడి వోలె

ఉద్దండ సంకల్పానివి,

ధర్మాచరణ సద్గుణాల సంపత్తి

నీకేది  సమానం ఇలలో.

 

నీవు నిత్యం నీవు సత్యం

రాముడివో,కృష్ణుడివో

ఆలవోకగా వారిని బతికించావు

ఏమి చెప్పను నీవు లేవు కదా!!

 

నీవు శాశ్వతం, నీ దృక్పథం

నీ అభినివేశం, నీ కార్యసిద్ధి

ప్రతి ఒక్కరూ అవలంబించాలి

ఆచరించాలి ఇలలో నీ రూపంగా!!!

 

ఇంకా మాతో ఉన్నావు అందుకే

ధైర్యంగా పలుక గలుగుతున్నాం

మా ఎన్టివోడు

మా ఎన్టీఆర్

శాశ్వతం అందరి హృదయాలలో

రాముడిగా రమణీయ శ్రీకృష్ణుడిగా!!!

జోహార్లు జోహార్లు జోహార్లు !!!

** ** ** ** **

నటనకే వన్నెతెచ్చిన నందమూరి

-ఆచార్య అయ్యలసోమయాజుల ప్రసాద్

 

రాముడైనా, కృష్ణుడైనా

భరతావనికే కాదు

వసుధకే గుర్తుకొచ్చేది ఆయనే.

 

నిండైన విగ్రహం

నిజమైన దృక్పథం

సినీరంగంలో రారాజు

ప్రజల అభిమాన నాయకుడు  

నేటికి చిరస్మరణీయుడు

 

దేవత సినిమాలో

భార్య మృతి సందర్భంలో

“బొమ్మను చేసి, ప్రాణం పోసి..”

పాటలో నటన చూసి

కంట నీరు రాని ప్రేక్షకుడు లేడంటే

అతిశయోక్తి కాదు.

 

రక్తసంబంధం, ఆత్మబంధువు,

కలసిఉంటే కలదు సుఖం వంటి

సినిమాలలో నటన

'న భూతో న భవిష్యతి'

పాతాళ భైరవి లో తోట రాముడు  

నర్తనశాలలో బృహన్నల

జస్టిస్ చౌదరి, కొండవీటి సింహం లో

న్యాయానికి ప్రతీక

ఎన్నో ఎన్నెన్నో పాత్రలకే

జీవంపోసిన మహానటుడు

నటనకే వన్నె తెచ్చిన మహనీయుడు

 

తెలుగుభాష కీర్తిని

అంతర్జాతీయ స్థాయిలో వ్యాపింపచేసి

ప్రజాక్షేమమే సమాజాభివృద్దిగా

ఆచరించిన ప్రజానాయకుడు

అనేక సంక్షేమ పథకాలను ప్రవేశపెట్టి 

మూడు సార్లు ముఖ్యమంత్రిగా ఎన్నికై

తెలుగు ప్రజల హృదయాలలో 

చిరస్మరణీయంగా నిలచిన మహానీయునికి

శతకోటి వందనాలు!!

** ** ** ** **

అవతార పురుషుడు

-రవీంద్రబాబు అరవా

 

తెలుగు ప్రజల హృదయాల్లో

చెరగని ముద్ర

అవతార పురుషుడిగా

అనంత కీర్తి

ప్రపంచానికి

తెలుగువారి ఉనికిని చాటిన మూర్తి

తిరగరాశారు తనదైన చరిత్ర

గూడు కట్టుకున్నారు ప్రతి హృదిలో

రాముడైనా కృష్ణుడైనా

ఆయనే ప్రతి మదిలో

ఏ పాత్ర వేసినా చేసారు న్యాయం

అందులోనే పరకాయ ప్రవేశం

పలు చిత్రాల నిర్మాణం

మరెన్నో చిత్రాలకు దర్శకత్వం

పట్టుదలకూ, క్రమశిక్షణకు మారుపేరు

పంచె కట్టును ప్రపంచానికి పరిచయం

చిన్నవారికైనా ఇచ్చారు పిలుపులో గౌరవం

మూడు సార్లు గెలిచిన ముఖ్యమంత్రి

తెలుగు జాతి ఆత్మగౌరవ పునరుద్ధరణకే  జీవితం

బడుగు బలహీన వర్గాలకి ఆరాధ్య దైవం

ఆడపడుచులకు ఆస్తిలో వాటా హక్కు

బలహీన వర్గాలకు లక్షలాదిగా ఇళ్లు

ప్రతిపక్షాలను ఒకతాటిపైకి తెచ్చిన నేత

రెండు రూపాయల కిలో బియ్యం ఇచ్చిన అన్నదాత

మనుషుల్లో దేవుడంటే కాదేమో అతిశయోక్తి

 

** ** ** ** **

మేరు ‘నట’ ధీరుడు

-చంద్రకళ దీకొండ

 

రైతు కుటుంబంలో జననం

హోటళ్లకు పాలమ్మి

నిరంతర కృషితో ఉన్నత

స్థానానికి చేరుకున్న కృషీవలుడు!

 

నడివయసులో

ముదిమి వయసు భీష్మునిగా

మధ్యతరగతి బతుకలేని బడిపంతులుగా

ఆంగిక, ఆహార్య, వాచిక అభినయాలను

పాత్రకు తగినట్టుగా సర్దుకొని  

జలంలా మార్చుకొన్న

విశ్వవిఖ్యాత నట సార్వభౌమ

 

ఐదు దశాబ్దాల పాటు

స్ఫురద్రూపం

సుగాత్రం

సరస సమ్మోహన నటన

నవ నవోన్మేష

చైతన్య స్వరూపం

ప్రేక్షకుల హృదయాలు రసప్లావితం

 

నలభయ్యో ఏట పట్టుపట్టి

కూచిపూడి నృత్యం అభ్యసించిన

మొండి పట్టుదల

ప్రతిభ, నైపుణ్య పటిమ ఉన్న

కవిసామ్రాట్ విశ్వనాథ శిష్యరత్నం!

 

క్రమశిక్షణకు మారుపేరు

కృష్ణ, రామ పాత్రలకు పెట్టింది పేరై

ఇంటింటా పూజలనందుకున్న

నందమూరి అందగాడు!

 

వెండితెరపై

నాయక పాత్ర అయినా

ప్రతినాయక పాత్ర అయినా

రాజకీయ యవనికపై

ముఖ్యమంత్రి పాత్రనైనా

నిబద్ధత, నిజాయతీ, నిర్భీతి

నిక్కచ్చితనంతో పాత్రపోషణ

చేసిన ప్రతిభామూర్తి!

 

అవినీతికి ఆమడదూరంగా

పేదప్రజల పాలిటి పెన్నిధిగా

ఆడపడుచులకు ఆస్తిహక్కును

ప్రసాదించిన అన్నగా

అతిథులకు స్వయంగా

భోజనం వడ్డించిన అతిథేయిగా

చిన్ననాటి స్నేహితులను

మరువని స్నేహశీలిగా

తెలుగు వారి

ఆత్మగౌరవాన్ని తట్టి లేపి

ఆత్మాభిమానానికి ప్రతీకగా నిలిచి

చరిత్రలో చిరస్మరణీయునిగా

నిలిచిన (సి)తారక

మేరు ‘నట’ధీర

రామారావు!!!

** ** ** ** **

యుగ పురుషుడు

-మోటూరి శాంతకుమారి

 

కృషి ఉంటే

మనుషులు ఋషులౌతారు

మహా పురుషులౌతారు

అన్నమాటకి

నిలువెత్తు నిదర్శనం

ఆంధ్రుల అభిమాన

అన్న గారు

కృషీవలుర కుటుంబంలో జననం

నిర్విరామ కృషికి

వెనుతీయని తత్త్వం

 

అకుంఠిత దీక్ష క్రమ శిక్షణ తో

సినీ రంగ శిఖరాగ్రాన్ని

చేరిన అనితర సాధ్యుడు

తెలుగు జాతి ఖ్యాతిని

దశదిశలా చాటిన

నవరస నటనా సార్వభౌముడు

యుగానికొక్కడు

యుగపురుషుడు

బహుముఖ ప్రజ్ఞశాలి

రాజకీయంలో ఎదురు లేని నాయకుడు

ఆత్మ గౌరవమే ఆయుధంగా

ముఖ్య మంత్రి పీఠం ఎక్కి

మనసున్న నాయకుడిగా

ప్రజాభిమానాన్ని చూరగొని

అభిమానంగా అన్నగారూ

అని పిలిపించుకున్న నాయకుడు

 

జీవితం అనేక

మలుపుల కదంబం

వ్యక్తిత్వ వికాస

పాఠాల సమన్వయం

తెరమీదే కాదు

తెర బయట కూడా

తిరుగులేని నాయకుడు

పిల్లలకి ఆదర్శ తండ్రి

తెలుగు జాతి మరువలేని

తిరుగులేని మహానాయకుడు

** ** ** ** **

యుగ పురుషుడు

- నగునూరి రాజన్న

 

వైవిధ్య నామం

విభిన్న స్వభావం

దీక్షా దక్షతల సంకేతం

పట్టుబట్టి సాధించే తత్వం

 

తెలుగింట అన్నకు చిరునామా

మదరాసి మరకను తుడిచి

తెలుగువారికి దశదిశలా విశ్వవ్యాప్తంగా

తిలకం దిద్దిన ధీశాలి  

 

చారిత్రకంలో చక్రం తిప్పి

జానపదాలలో జనం మనసు దోచి

సాంఘికంలో సమభావం చూపించి

పౌరాణికాలలో ప్రాణ ప్రతిష్ట గావించి

కుటుంబంలో ఒకరిగా కలిసిపోయారు

 

మనదేశం మైలురాయిని

పాతాళభైరవితో బద్దలుకొట్టి

మాయాబజార్లో  మర్మం జోడించినా

భూకైలాస్ లో  రావణబ్రహ్మయినా

లవకుశులో రాముడిగానైనా 

శ్రీకృష్ణ తులాభారంలో కృష్ణుడు గానైనా

తెలుగువారి ఆరాధ్యం సర్వామోదం

 

బృహన్నలగా శాస్త్రీయ సంగీతం

నేర్చుకుని

అలవోకగా అతిపెద్ద

సంభాషణలను చెబుతూ

కెమెరాముందు తడబడని తత్వం 

 

రాజకీయమైనా రమ్యమనోహరమే

బడుగులు బలహీనులకు

రెండు రూపాయిలు కిలో బియ్యమై

బ్రతుకునిచ్చిన భరోసా సూత్రం 

 

సినిమారంగంలో చిత్రంగా మెరిసి

రాజకీయంలో తుఫానులా దూసుకొచ్చి

తన ప్రాభవాన్ని నిరూపించుకున్న

నిత్యచైతన్య శీలి నిజ తపోధనుడు 

 

లెక్కలేనన్ని అవార్డుల పంటలు

లెక్కకు మించిన సన్మానాలు

పక్కగా అందుకున్న పద్మశ్రీ బిరుదు

నటనలోన విశ్వ విఖ్యాత

నవరస నటనా సార్వభౌముడు

 

 

** ** ** ** **

నెవెర్..టర్న్.....రోర్(ఎన్టీఆర్)

-ఉండవిల్లి సుజాతా మూర్తి

 

నం దమూరి 

          తారక రామారావు

          విశ్వమంత ధ్వనిస్తున్న

          నామధేయం

 

ద  శ తిరిగే దశలవారీ అని

          చిత్రాలనుండి రాష్ట్ర

          పరిపాలనం

 

మూస పోసినట్టుండని

            నటనా కౌశలం

 

రి కార్డులకే రికార్డ్

            ఎన్టీఆర్ ప్రస్థానం

 

వ  హ్ వా! పురాణ

           పాత్రల ప్రూఫ్ చూపి

           ఏలిన శకం వ-

 

జ్రం మినహా వేరు భారీ

           పదమున్న బాగుండు

           నను భావం

 

        కొసమెరుపు గా...

 

తారకమంత్రమే క్రమశిక్షణ అయి

 

రామారావుగా చిరస్థాయిగా నిలిచె

** ** ** ** **

రారాజు

-ఉండవిల్లి వెంకట నారాయణ మూర్తి

 

నవరత్నాలలో ఓ రత్నం నందమూరి

విశ్వంలో విశ్వవిఖ్యాత నట సార్వభౌముడు

ప్రతినాయకుడుకి పట్టం కట్టించిన నటరత్న

నిమ్మకూరు చిన్నవాడు నటశిఖరాగ్రుడు

దివినుండి భువికేతించిన పౌరాణిక యశోధరుడు

జానపదాలకు జవసత్వాలిచ్చిన రాజులకే రారాజు

"అయ్యారే" "బాగు బాగు"

"ఏమంటివి ఏమంటివి" వంటి

పదప్రయోగాల ఉద్దండ చక్రవర్తి

 

ప్రజలకోసం ప్రజలచేత

ఎన్నుకోబడిన ప్రజానాయకుడు

విశ్వవిఖ్యాత నట సార్వభౌముడు

పద్మశ్రీ నటరత్న కళాప్రపూర్ణ

డా. నందమూరి తారక రామారావు

** ** ** ** **

 

యుగపురుషుడు

- లక్ష్మారెడ్డి  పసుల

 

 

స్వయం శక్తికి ప్రతీక

అభిమానధనుడతడు

సినీ వినీలాకాశంలో

స్వయం ప్రకాశిత తారక

నటనలో  నాలుగు దశాబ్దాల

నటజీవితం విజయపథంలో

సినీ జగత్తులో

మన దేశంతో తొలిఅడుగు

శ్రీనాథ కవిసార్వభౌమదాకా

వేసిన వేషాలెన్నో

పోషించిన పాత్రలెన్నో

సినిమా నిర్మాణ అన్నిరంగాల్లో

రాణించిన మహోన్నతుడు

తెలుగు సినీరంగంలో

రారాజు మేరునగధీర!

 

జానపద చిత్రాల్లో

కత్తియుద్ధ ప్రవీణ

పౌరాణిక చిత్రాల్లో

శ్రీరాముడిగా శ్రీకృష్ణుడిగా దైవస్వరూపం

సాంఘిక చిత్రాల్లో

యుగపురుషుడు దేశభక్తుడు అతడే

పాత్ర ఏదైతేనేం

నటనలో అగ్రగామి అతడే

చేయని ప్రయోగాలు లేవు

సాధించని విజయాలు లేవు

బహుపాత్రాభినయంలో

నవరస నటబ్రహ్మ నటసార్వభౌమ

ఏక కాలంలో

పంచపాత్రాభినయంలో నటరత్న!

 

రాజకీయాల్లోకి తొలి అడుగు

తెలుగు దేశం పార్టీ

నవమాసాల్లోనే

అధికార పీఠంపైకి

నూతన వరవడిలో

రాజకీయంలో

నూతనత్వం నందమూరితో

సంక్షేమ కార్యక్రమాలెన్నో

పరిపాలనలో పరిఢవిల్లె!

 

మద్యపాన నిషేధానికి

స్ఫూర్తి దూబగుంట ఉద్యమం

జాతీయ స్థాయిలో

మేటి నాయకత్వ పటిమ ఆనాడు

భాషకు సైతం అగ్రాసనం

తేనెలూరే అచ్చ తెలుగు భాషకు

చిరునామా అతడే

కర్తవ్య నిర్వహణ

బ్రహ్మ ముహూర్తం నుండే

ప్రజాసేవలో

నిరతం అసిధారవ్రతమే ఆ తాపసిది

కళామతల్లి సిగలో

కలికితురాయి నటరత్న!

** ** ** ** **

ప్రజల మనిషి

-ఆర్.ప్రవీణ్

 

మహా మహా నటుడు

దర్శకుడు

సమర్పకుడు

స్టుడియోల అధినేత

మన నందమూరి తారక రామారావు

 

విభిన్న పాత్రలను

అవలీలగా పోషించిన నటరత్న ఎన్టీఆర్

గంభీర కంఠంతో  

పాత్రలకే  వన్నె తెచ్చిన

తిరుగులేని కథా నాయకుడు

 

ఐదు పాత్రలను ఏకకాలంలో

సునాయాసంగా

పోషించిన ఏకైక నటుడు

పాత్రలకి జీవం పోసాడు

పాత్రలలో ఒదిగిపోయాడు

క్రమశిక్షణకి

తెలుగు భాషకి 

పర్యాయపదం  అయ్యాడు

 

శ్రీ రాముడు

శ్రీ కృష్ణుడి

ఆత్మలో

పరకాయ ప్రవేశం చేసాడా అన్నట్లుగా

పాత్రలకి వన్నె తెచ్చాడు

కేంద్ర ప్రభుత్వం పద్మ శ్రీ

బిరుదు ఇచ్చి సత్కరించింది

ఆప్యాయత గూడు కట్టుకున్నాడు ప్రేక్షకుల మదిలో

 

ఎన్టీఆర్ తీరు భిన్నం

నేల ఈనిందా? ఆకాశం చిల్లులు పడిందా?

ప్రజలు వీధిలో 

నిలబడ్డారు ఎన్టీ ఆర్ రాక కై

నిద్రాహారాలు మానారు

ఆడపడుచులు మంగళ హారతి పట్టారు

 

ఇచ్చారు

రెండు రూపాయల కిలో బియ్యం పేదలకు

రాజకీయ పార్టీ స్థాపించాడు

కేవలం తొమ్మిది నెలల్లో

గిన్నీస్ బుక్ లో

తన ఖ్యాతిని నమోదు చేసుకున్నాడు

అనూహ్యంగా రికార్డులు బద్దలు కొట్టీ

అధిరోహించాడు ముఖ్య మంత్రి పీఠాన్ని

 

ఎన్టీఆర్ ప్రజల గుండెలో ఉండిపోయాడు

కలియుగంలో యుగ పురుషుడు ఎన్టీఆరే

** ** ** ** **

నందమూరి నటుడు

-జక్కని గంగాధర్

 

ఆ.వె.

తెలుగు వారిబిడ్డ తెలుగు చిత్రాలలో

హీరొగాను నిలచె హిందువితడు

కర్ణుడుగను తాను కరిగించె మనసును

ఎన్టియారు యితడు నెంత ఘనుడు!

 

ఆ.వె.

జానపదము నందు జనమును మెప్పించి

రాజుపాత్ర వేసె రమ్య ముగను

మాంత్రికులను చుట్టి మట్టుబెట్టుచు నుండె

నందమూరి నటన నభ్భుతముగ?

 

ఆ.వె.

రాజకీయ మునను రాణించె గొప్పగా

ముఖ్యమంత్రి యాయె ముద్దుగాను

ప్రజల కొరకు తాను పంచెను బియ్యము

పేరు గలిగె నండి పెద్ద గాను!

** ** ** ** **

భిన్నత్వంలో ఏకత్వం-

ఏకత్వంలో భిన్నత్వం

-బస్వమోహన్ రావు

 

ఎవరికీ తల వంచవు

ఎవరినీ యాచించవు

కండబలమే నీ ఆయుధం

గుండె బలమే నీ ధనం

ఏమని వర్ణించనూ....

శతాబ్దపు అద్భుతానివనా

కారణజన్ముడివనా

' రీల్ ' హీరోవే కాదు-

రియల్ హిరోవి కూడాననా

నిండిపోతుంది ప్రతి పేజీ

నిన్ను వర్ణించడం మాత్రం కాదంత ఈజీ

సాంఘిక, జానపద, పౌరాణిక

'పాత్ర' ఏదైనా వన్నె తెస్తావ్ అవలీలగా

లీనమే అయిపోతావసలు....

ఆ పాత్రగా

భిన్నత్వంలో ఏకత్వం

ఏకత్వంలో భిన్నత్వం...

అంటే నందమూరేనా

రొమ్ము విరుచుకుని

కళ్ళల్లోకి చూస్తూ సూటిగా

ఘాటుగా చెప్పాలని చెప్పావ్

ప్రతి ఆంధ్రుడికీ

తెలుగువాడిగా

పౌరుషం,

ఆత్మ గౌరవం

అంటే ఇదేనా

ప్రతి గుండెనూ నిండుగా

నీలా తాకడమేనా

ఓ నందమూరి తారక రామా!

అన్నావు

మనిషై పుట్టినవాడు కారాదు మట్టి బొమ్మ అని

అలానే యేలావు ఠీవిగా

సినీ జగత్తుని

రాజకీయ రంగాన్ని

దోచుకుని ప్రతి హృదయాన్ని

అదేంటో

భీష్మునిలా ఆగినట్లు

ఇచ్ఛామరణం కోసం

చాలించావ్ తనువును

ఎదురుచూస్తూ ఉత్తరాయణం కోసం

 

నీ మది చల్లగా 'రామా' నిదురపో

దేవుని నీడలో వేదన మరచిపో!

 

** ** ** ** **

ధ్రువతార

-ఎస్. సింహాచలం

 

తెలుగు సినీ అంబరాన మెరిసిన

ఓ ధ్రువతార ఎన్.టి.ఆర్

రామునిగా,కృష్ణునిగా

రావణునిగా,దుర్యోధనునిగా

నాయక,ప్రతినాయక పాత్రలను

పోషించి,

అభిమానుల్ని అలరించిన

నటకిశోరం ఎన్.టి.ఆర్.

 

చిరునగవుతో

మృదువైన భాషతో

లలితంగా

హావభావాలను ప్రదర్శిస్తూ

సుతారంగా

వేణువును కదలిస్తూ

కృష్ణునిగా,ఆయన చూపే నటన

కమనీయం

రమ్యాతిరమ్యం.

 

'లవకుశ'లో

రాముని పాత్రలో ఐక్యమై

సాత్వికగుణ సంపన్నునిగా

ఒదిగిపోతూ

అలనాటి కోదండరాముణ్ణి

మనసున ప్రతిష్ఠింపచేస్తూ

అసమానమైన నటనా కౌశలాన్ని

ప్రదర్శించిన

'నటసార్వభౌముడు'...ఎన్.టి.ఆర్

 

 

'సీతారామకల్యాణం'లో ప్రతినాయకునిగా

రావణబ్రహ్మ పాత్రకు న్యాయం చేసి,

అందరిని ఆశ్చర్యచకితుల్నిచేసి,

నటనలో నిష్ణాతుడిననిపించుకున్న...ఎన్.టి.ఆర్.

 

 

సినిమా హంగుల్ని,ఆర్భాటాల్ని

ప్రక్కన పెట్టి,

'ప్రజలే నా దేవుళ్ళు'అన్న నినాదంతో

ఎండనక,వాననక

చలికి లెక్కచేయక

'చైతన్యరథం' పై తిరుగుతూ

చైతన్యాన్ని రేకెత్తించే

మహానాయకుడు....ఎన్.టి.ఆర్.

 

తెలుగుజాతి కీర్తిని

ప్రపంచపటంలో

అవిష్కరించిన

బహుముఖ ప్రజ్ఞాశాలి..ఎన్.టి.ఆర్

 

 

** ** ** ** **

అవతారమూర్తి

- గడ్డం మురళీకృష్ణ

 

ఎన్టీయార్

మూడు అక్షరాల

నిలువెత్తు నటనా ప్రతిభ

తెలుగు జాతి

తరతరాలు గుర్తుంచుకునే

చెరగని ప్రభ

వెండితెర రారాజు

ప్రేక్షక హృదయాల నెలరాజు

మేరునగ ధీరుడు

ఈతరం యుగ పురుషుడు

సుయోధన భీమార్జున

శ్రీకృష్ణ కర్ణ

రామ రావణ

పాత్రల కథానాయకుడు

నట సార్వభౌముడు

నిర్మాణ దర్శక ప్రవీణుడు

తానొక నిష్కళంక మూర్తి

సినీ పాత్రల కోసం

పుట్టిన అవతారమూర్తి

రాజకీయాలలో

ఇమడలేని నాయకుడు

కుటిల కుట్రలలో

బలైన అమాయకుడు

గ్రహణం బారినపడి

బాధతో నిష్క్రమించిన

పడమటి సూర్యుడు

వన్నె తరగని

దిశలు ఎరుగని

తెలుగు నటుడు

మా నందమూరి

తారక రాముడు